టాలెంట్ ఎక్స్ ప్రెస్ న్యూస్:
ప్రకృతి సహజసిద్ధంగా ఏర్పడిన ఒక అద్భుతం
మనిషి జీవితంలోనే కాదు సినిమాలో కూడా ప్రకృతి ఒక భాగం, ప్రకృతిలోని అందాలను తమ కెమెరా కళ్ళతో ప్రేక్షకులకు చూపిస్తారు దర్శకులు.తొలి తెలుగు టాకీ చిత్రం భక్త ప్రహ్లాద 1932 లో వచ్చింది, ఆ తరువాత ఎన్నో బ్లాక్ అండ్ వైట్ సినిమాల పరంపర కొనసాగింది, అయితే అప్పట్లో సినిమాలన్నీ దాదాపు స్టూడియోల్లోనే చిత్రీకరించేవారు, ఒకవేళ కొండలు పొలాలు పార్కులు లాంటి ప్రదేశాలు అవసరం అయితే తెర కట్టి ఆ తెరమీద పెయింటింగ్ తో పొలాలు కొండలు వేసి షూటింగ్ చేసేవారు, తరువాతి రోజుల్లో సెట్ చేసేవారు.
ఔట్ డోర్ షూటింగ్ లో చాలా తక్కువగా చిత్రీకరణ జరిపేవారు, అయితే 70 లో నుంచీ పరిస్థితి మారింది, ఊటీ కొడైకెనాల్ లాంటి పర్యాటక ప్రదేశాలే కాకుండా, విదేశాల్లో కూడా షూటింగ్ జరిపుకున్న చిత్రాలు అనేకం...
అయితే ఎన్ని ప్రదేశాలు ఉన్నా గోదావరి ఒడ్డున ఉన్న కుమారదేవం చెట్టు మాత్రం చాలా ప్రత్యేకం, ఇక్కడ షూటింగ్ జరుపుకున్న సినిమాలు దాదాపు అన్నీ పెద్ద హిట్లే, 150 ఏళ్ళ జీవితకాలంలో 300 సినిమాల్లో కనిపించింది ఈ చెట్టు.కుమారదేవం సినిమా చెట్టు ఇకనుంచి ఒక చరిత్ర... పోటెత్తిన గోదావరి వరదతో ఈ చెట్టు కూలిపోయింది. కొవ్వూరు మండలం తాళ్ళపూడి దగ్గర్లోని కుమారదేవం గ్రామంలో ఈ నిద్ర గన్నేరుచెట్టును గోదారితల్లి ఒడ్డున నాటారు మహానుభావుడు శ్రీ సింగలూరి తాతబ్బాయి .ఎన్నో వరదల్నీ, తుఫాన్లనీ,తట్టుకుంటా తరతరాల్ని చూసుకుంటా పెరిగి మహా వృక్షమైన దీన్ని పేరు కూడా మర్చిపోయి సినిమా చెట్టు అని పిలుస్తారిక్కడి జనాలు. అలా అనడానికి కారణం దీనికింద పాడిపంటలు ,దేవత ,వంశవృక్షం,బొబ్బిలిరాజా,హిమ్మత్వాలా,సీతారామయ్యగారి మనవరాలు ఇలా లెక్కెట్టు కుంటా పొతే మొత్తం నూటెనిమిది సినిమాల షూటింగ్ జరిగింది .కెమేరా తీసుకొచ్చి దీని కింద పెడితే ఫ్రేము దానంతటదే వచ్చేస్తుంది. అంత మహత్యం ఈ చెట్టుది. ఇంకో విషయం ఈ చెట్టు కింద ఒక్క షాట్ తీస్తే చాలు సిన్మా సూపర్ హిట్టు అన్న సెంటిమెంటు కూడా వుంది . దర్శకుడు వంశీ గారు అయితే ఈ చెట్టు లేకుండా సినిమా తీయరు. రాఘవేంద్రరావు గారు, దాసరి గారు , జంధ్యాల గారు, ఇవివి గారు ...ఇలా గొప్ప డైరెక్టర్లందరూ ఈ చెట్టు చుట్టూ తిరిగినవారే.
150 ఏళ్లనాటి సినిమా చెట్టు
🔸ఈ చెట్టు వద్ద 308 సినిమాల చిత్రీకరణ
🔸వంశీ దర్శకత్వంలో 18 చిత్రాల షూటింగ్
1974 లో వచ్చిన పాడిపంటలు
చిత్రంలో ఇరుసులేని బండి ఈశ్వరుని బండి
పాటతో మొదలైన ఈ చెట్టు ప్రస్థానం...
సీతా రామయ్య గారి మనవరాలు లో సమయానికి...,గోదావరి లో ఉప్పొంగేలే గోదావరి లాంటి పాటలు ...ఇలా ఒకటేమిటి
చెప్పుకుంటూపోతే వందలాది పాటలు...
జనాల గుండెల్లో ఇప్పటికీ పదిలంగా ఉన్నాయి...
ఎన్నో వరదల్నీ తుఫాన్లనీ, తట్టుకుంటూ తరతరాల్ని చూసుకుంటూ పెరిగి మహా వృక్షమైన సినిమా చెట్టు ఇక లేదు అనే వార్త నిజంగా బాధాకరం.
- సేకరణ